歐洲各大聯賽球隊已經陸續公布來季球員球衣冧巴，想知英超降班隊新特蘭將會賣走乜人，基本上睇睇佢哋個冧巴名單就一清二楚。好似菲臘斯被分配十九號球衣，着開嗰件十號就俾史超活代替，菲臘斯響新特蘭應該「命不久矣」囉。
除咗菲臘斯外，其他名將好似雷拿（四號變廿四號）、蘇連遜（一號變廿五號）費奧（九號變廿九號）、米高格雷（三號變十七號）都失去原本冧巴，反映會方有意盡快賣走佢哋。
講時講，新特蘭已經同意賣中場麥肯畀維拉，轉會費係二百二十五萬鎊（約二千八百萬港元），查實新特蘭求「財」若渴，佢急你唔急，維拉等轉會市場關閉前至出手應該可以買平啲。據聞菲臘斯市值都係二百萬鎊左右，麥肯唔應該貴過佢。維拉領隊奧拉利會唔會心急咗呢？
據報話愛華頓就買斷李鐵一事，繼續同波導戰鬥討價還價。愛華頓領隊莫耶斯前日開門見山咁講「我哋會睇價錢至決定做唔做呢宗生意」。請留心「生意」呢兩個字，李鐵咁努力比賽，估唔到今時今日莫耶斯仍當買佢只係一盤生意；睇怕李鐵聽到應該都會失落。
列斯前鋒維杜卡前日友賽對約克郡時好火爆，踢親對方球員佐敦（曼聯名宿祖佐敦個仔）領黃牌後，重搵個波掟對方個頭。可能因為友賽關係，球證冇送多個黃牌趕佢出場，而走去場邊叫列特換走佢。假如維杜卡被罰出場，就面臨停賽，唔怪得列特賽後多謝球證網開一面啦。
因戲金問題最後取消大馬站嘅皇家馬德里，最新消息話佢哋以「賣大包」價錢七百八十萬港元，將最後一站亞洲行改喺八月十日鬥泰國國家隊。原來皇馬同外國電視台一早傾好晒四場波嘅轉播費，𠵱家俾大馬政府一鑊撬起，皇馬為咗唔想賠償，所以就大賤賣益泰國觀眾。
高比仔最近因為被控強姦罪而搞到一身蟻，有關佢嘅負面新聞幾乎無日無之。美國最暢銷嘅《體育畫報》，今期更加破天荒用咗高比仔之前向警方自首時影嘅「監躉相」做封面。張中嘅高比仔眼神呆滯、木無表情，而且張相質素好差，《體育畫報》靠害乎？