千辛萬苦終於等到禮拜尾！呢個周五晚，大家嘅鍊車衝動已經被推至最高峯；當天色完全黑齊，最新嘅RX-8、全改嘅「掃把佬」……全部都會準備就緒落場廝殺！唔好誤會教大家去睇非法賽車，事關名氣大作PS2版《首都高Battle01》今個星期剛剛落場，趁住嚟緊六、日放假，重唔同人鍊到癲！
記者、攝影：朱崇德
ImageGirl：Blanche
今次《首都高Battle01》可以話係首次以PS2遊戲引擎開發的《首都高》系列，以往同系列作品都只是從其他主機移植過來，所以第一點叫小記留意嘅，就係有冇用盡主機功能。隻Game不論開場CG以至遊戲進行畫面，都係歷代中最精細、最像真嘅一次，有幾真？戰車全部跟足原廠設定，操控有自己特性，工程最浩大就係遊戲每條賽道同建築物，都係參照日本實地環境資料，再用電腦重新模擬出嚟，所以大家喺Game度鍊車，同去日本實地鍊車真係無兩樣！
遊戲模式分4種，2人連線對戰嘅「VSBattle」、考驗自己戰車有幾快嘅「TimeAttack」、熟習路段及汽車性能嘅「FreeRun」（有人話佢係遊車河），不過精髓當然係故事模式「QuestMode」啦！故事講述兩年前以迅帝為首的「十三鬼將」，突然間在首都上銷聲匿迹，引發多股新勢力入侵首都高，玩家就係當中一人。最有公路鍊車Feel嘅「閃頭燈挑車」，由以往東京首都高，拓展至大阪阪神高速公路，同名古屋高速公路，令耐玩性大增。東京路面比較多彎、名古屋就多直路、大阪就在兩者之間，所以架車喺TuneUp馬力同靈活性係玩者重要研究課題，小記在此預告，名古屋特別多波子一類高速歐洲車，同佢鬥極速直路，真係唔容易！
同上幾集一樣，「挑」車時有所謂的SP值（士氣），愈領前愈能扣對手SP值，冇晒SP就輸，就係靠喺公路上搵錢TuneUp架車，新加入嘅1對2連戰模式，玩者同時被兩架車「挑」，俾電腦夾擊、前追後逐，刺激感倍增！今集一開場只可以選用日本車，大廠如NISSAN、MITSUBISHI、TOYOTA等全部有齊，一開場最養眼當然係萬事得架RX-8啦，搵錢愈多，隱藏車亦有機會出現，暫時知道會有蓮花、福特、福士、平治等幾間歐美大廠，不過實際型號未有公布，有志氣嘅當然係自己打佢哋出嚟啦！
機種：PS2
生產商：GENKI
總代理：龍宇有限公司
遊戲類型：賽車
價錢：$378