噚日蘭西講完新地捐五十萬，響應淮河救災後，即刻收到料，原來長江實業主席李嘉誠嘅私人基金會，總共捐咗超過一千二百萬，用嚟賑濟受淮河洪澇同雲南地震影響嘅災民，而救助方式重好特別，係直接捐出大米畀災民。
呢批大米已經喺今個禮拜初開始運去災區，重由李嘉誠基金會人員親自監運，確保可以即時分畀災民。
今次捐出嘅大米，原來係和記黃埔喺黑龍江種植嘅「碧香稻」珍珠米，聽講話質素比一般大米好。
基金會發言人話，捐白米，係希望能用最快同最直接嘅方法，令災民受惠。今次捐出嘅大米共有二千一百公噸，預計可賑濟一百萬災民。捐贈救災人人有責，唔理用乜嘢方式，統統值得鼓勵，愈快幫到災民就愈好。
萊坊國際宣布，委任龐立德（MarkBernard）為企業房地產代理部執行董事，加強公司嘅租務發展。
龐立德喺香港做代理已有十三年，之前喺高力國際任職（前稱怡高物業顧問），九五年起做到執行董事兼商業部主管，負責公司嘅租務管理業務。喺高力之前，佢就喺卓德測量師行，同澳洲魏理仕做過。龐立德重擁有澳洲拍賣官牌照同代理牌照。
新地元朗YOHOTown，上個禮拜六公開發售最平嘅十六個單位，事後蘭西收到讀者投訴，話發展商冇登報公布抽籤次序，問完一輪至知係由發展商通知代理，再由代理通知準買家。
讀者諗，公開發售以外嘅單位八九十萬都應該有交易，點知發覺全部要一百萬以上。佢不滿新地用平價單位吸引買家入票，冇登報公布抽籤結果係「黑箱作業」。
蘭西問過新地，佢哋答覆話，低價推盤係宣傳手法。透過代理通知準買家，令佢哋可以快啲知道抽籤結果。新地又有通知頭幾十個準買家，得知佢哋都會揀樓，所以冇通知籌號較後嘅登記者。新地承諾會跟進呢個投訴個案。
新地又話，成個抽籤過程都有獨立人士監察，黑箱作業係無根據嘅揣測。
恒基兆業馬鞍山新港城，同將軍澳新都城商場，喺八月份會搞個「夏日動感跑、跳、碰」，其中一項活動係跳彈床表演。表演嘉賓係「健力士」紀錄保持者同奧運銀牌得主KenKovach。
佢喺二千年創出「健力士」紀錄，一分鐘內喺彈床上跳到二十呎高，同時喺呼拉圈內打觔斗達一百二十二次。
另外，恒基喺美國運咗五項遊戲組件嚟香港，包括「全透視攀石」、「陸上滑浪風帆」、「GoalGoal足球」、「搖擺欖球」同「籃球當入樽」。
何文田君頤峰就快開賣，各代理已積極備戰，中原同美聯都為樓盤印製小冊子，等前線代理用嚟sell客。美聯嘅小冊子，推銷君頤峰典雅同皇室嘅感覺，再配上維港夜景，主要係凸顯該盤嘅氣派。
美聯董事羅國安話，九龍區就快會展開大型攻勢，而美聯新界區話會「衝出新界」，第一擊就係攻君頤峰呢個盤。
至於中原，今日已經為君頤峰搞誓師大會，認真神速。睇嚟代理之間嘅宣傳戰會好戲連場。
蘭西
電郵地址：
