颱風「伊布都」來得快去得又快。e莉莎諗住點都有半日假可以唞唞，所以周三Fever咗一晚，點知港股噚日只係延遲半粒鐘開市，搞到牙都未刷就要趕返工，甚為狼狽。
先前平倉嘅好友發現港股繼續開市，而外圍變動又唔大，自然要入市再造好倉，恒指一度重上10000大關，不過最終都係企唔穩，收報9923，升幅收窄至22點，成交只得68.21億元。
德永佳（321）俾人話業績差過預期，管理層隨即出來解釋，話只係因為棉價高咗令成本上升，日後將擴大產能，減少成本上升的影響。噚日股價亦見企穩，收報6.20元，回升0.8%％，成交5015萬元。
中聯系統（757）將可換股債券行使價大降65%，由每股0.85元降至0.30元，令到和黃手持的1.98億元可換股債券，可兌換中聯43%股權，成為大股東，消息刺激中聯股價勁升7.8%，收0.55元。
有和黃做大股東當然值得跟炒，不過唔好忘記，中聯此番減價讓和黃做大股東，亦可能反映公司無力贖回債券。公司全年勁蝕1.74億元，現金及等價物僅1.08億元，除非股民認為和黃入股後可改善中聯業務，否則唔好對此股過份憧憬。
瑞安（983）獲得VP垂青，增持股份至5.3%，刺激股價大升近12%，收報5.45元。
VP一向無寶不落實，唔通香港建築業出現曙光？非也！據聞VP只係睇中瑞安國內業務而已。
阿虎