相信大家都記得，七月特別多集會，先後有7.1大遊行、7.9集會同埋7.13民主大會，八方噚日同搞7.13民主大會嘅民主發展網絡（DDN）主席朱牧傾開，先知佢哋原來曾經因為唔夠錢抹一額汗。
朱牧話佢哋喺7.13前，銀行存款只有兩萬蚊，但係成個集會耗費九萬幾！咁點算？佢哋當時冇理，一嚟可能因為DDN入面好多神職人員，好似朱牧、夏其龍神父咁，大家都覺得上天自有安排，二嚟佢哋都諗住如果唔夠錢，咪大家一班搞手諗掂佢。
好彩得到上天眷顧，當日民主大會兩萬人出席，竟然籌到二十萬元，可見香港人爭民主出錢又出力。
當日有份滿場飛籌款嘅何秀蘭話，幾名工作人員捧住個紙皮箱向市民籌款，反應出奇咁好，紅衫魚基本上係「最低消費」，大牛、金牛都有唔少，有人重見到中央政策組顧問練乙錚放低咗張大牛。
傳真︰2623-9278
電郵︰