個市反反覆覆，恒指埋單微升22點，暫時炒輪嘅策略，係低買高賣。唔少熱門Call輪，即日波幅幾乎去到2成，例如和黃Call輪9765，最低25仙，最高30仙，中間捉正上落，已經係有魚有肉，而隻輪有呢個波幅，只不過正股（013）有1.10元波幅而已。
9765今年9月到期，現價27仙，按照昨日變化，可以吼住近25仙嗰陣買入，挨近30仙嗰頭沽出，做吓即日鮮。
大藍籌中，太A（019）算係硬淨，收35.60元，升40仙，呢件通常都唔點跟大市，又間中忽然發吓神經，整幾鋪獨家表演，細細注吼吓件Call輪9660。隻輪昨收40仙，升得1.5仙，明年1月底夠鐘，大把時間，唔使驚住輸溢價縮水，就算坐盤都冇有怕，溢價6.4%，槓桿率8.9倍，數據算係咁。
另一件硬淨藍籌係九倉（004），收15.30元，升15仙。九倉亦未必跟足大市變化，可以細注短炒Call輪9638，呢件仙輪，交投好熱鬧，昨有44球易手，明年1月到期，現價9.4仙，溢價16.5%，槓桿率16.3倍，溢價唔低，但有高槓桿率同壽命長戥住，適合炒出炒入。中海油Call輪9535可以留意吓，年底到期，現價20.4仙，溢價1.4%，槓桿率5.9倍。正股（883）睇好，隻輪又係。
章盛