小初記得經紀黃在4月份，曾同小初品題過做高爾夫球桿嘅順龍控股（361），當時佢話公司業績見得人，派息比率又唔錯，符合芬佬口味，可以一諗。之後隻股一直在0.90元至1元水平浮沉，悶到小初想瞓覺。
不過，順龍近排突然發威，在唔夠10日內，由1元水平一條氣炒上去，前日最高見過1.61元，噚日一度吐回至1.53元，但最後仍扭轉劣勢，倒升0.64%，收1.57元。
經紀黃話，順龍股價急升，關鍵在於大老闆在星期一，以每股1.25元減持3000萬股，相當於已發行股份9.9%。小初心諗，莫非股份落在炒家之手，先至炒得咁高興？
經紀黃話唔可以咁講，佢重話小初實在唔知家陣股壇形勢，現時芬佬與炒家嘅區別已變得愈嚟愈細，好似金手指咁，佢哋沾手嘅股份，冇邊隻唔係炒到飛起。
順龍股價雖然升咗好多，但由於大戶仍然揸住批貨，就算現時PE高達十幾倍，但股價若再砌上去，佢亦唔覺得出奇。
慕容小初