今次颱風「伊布都」吹襲香港來勢洶洶，趙飛雲起初相當擔心，因為近排港府夠晒黑，香港隨時會再出現嚴重災難。好彩颱風及時轉軚，只係輕輕掠過香港，並無釀成嚴重傷亡，睇嚟香港亦唔衰得晒。有老友話，可能係梁、葉辭職，化解部份黑氣，如果董建華肯下台，香港更可以轉大運。
噚日大部份人預咗打風放假，點知天文台早上8點3改掛3號風球，令好多人失預算。趙飛雲上到股票行，大部份人都係熊貓眼兼無厘精神，唔使問都係成晚無瞓預支假期。港股不但遲咗開市，早市走勢亦似瞌眼瞓，午市初段則無緣無故出現一陣亢奮，恒指急速升越1萬點，但好快已洩氣，最後僅升22點，收9923。
美股連續兩日反彈，港股昨日跟隨反彈，升近10日線（現處10055）即受壓回落，雖仍守20日線（現處9909）之上收市，但4月至今的升軌則輕微跌穿，今日若不能重返升軌之上收市，則形態上更明顯趨淡。恒指10日線仍在回落中，今日若見再一次後抽不破，先買入第1注恒指Put輪，可選擇9789或9735，首個目標恒指9700，下1個目標9500。
中國海外（688）揸到悶，加上後市向下調整機會大，趁有些少微利沽出計數。倉內只剩下尚在停牌的意科（943）。今日短炒可留意重慶鋼鐵（1053），近期升至2.275元展開調整，昨日跌至20日線1.91元反彈，收1.98元，微跌1仙。日線圖現十字星，在1.95元附近吸納，以1.91元止蝕，首個目標2.075元。
趙飛雲