董特首周街搵人做財政司司長，暫時重未有人肯公開話幫佢。八方連日收料，講嚟講去都係嗰幾個大名，其中一個比較黑馬人選，係中大副校長廖柏偉；佢唔只俾人傳做財司，重傳係中大校長嘅候選人馬，有人問佢老兄乜忽然咁紅，佢笑話自己都係睇報紙先知道做咗候選人，重話做副校長做得好開心，並無周圍搵工做。
廖副校長係美國史丹福大學經濟博士，為人一向低調，但以前做過創科會嘅成員，又係策發會同經濟諮詢委員會一分子，阿董肯定好重用佢。
如果最後成事，中大就真係好幫老董，因為另一個財司人選鄭維健十月就會出任中大校董會主席，加埋前校長李國章做緊局長，劉兆佳做中策組阿頭，你話幾畀面呢。
當然，八方唔敢睇小港大校委會主席馮國經，佢肯定係大熱，因為噚日連唐英年局長都公開大讚佢有能力，絕對勝任，身邊嘅人都承認，阿董成日搵老馮，一日通幾個電話。但唔知邊個話，馮國經𠵱家住緊間屋好鬼大，佢未必鍾意搬屋。八方又收到讀者消息，話阿董忠實擁躉陳永棋個堂兄弟陳永燊，都好得「董事長」歡喜，係「超黑馬」，八方問棋哥點睇，佢竟然話，「係就恭喜佢啦！」
傳真︰2623-9278
電郵︰
