沉寂了好一陣子的洪朝豐，近日忙於籌備本月底推出的新書《繾綣男女》，當中洪朝豐訪問了十位分別有變性慾、已經變性及喜歡穿女人服飾的變裝男性，讓他們剖白內心世界，公開他們鮮為人知的性生活，希望藉此改變香港人對這群人的歧視眼光。
在洪朝豐本月底推出的新書《繾綣男女》中，先後訪問了十位「變裝愛好者」，所謂變裝，其實是指一群喜歡穿女性衣服的男性。
日前記者透過電話訪問洪朝豐，問他今次著書的目的時，他稱是應去年七月成立的「香港變裝之家」的邀請，洪朝豐說：「佢哋係一班嚟自唔同階層嘅人，鍾意着女仔衫嘅男仔，但絕對唔係男同志，唔一定鍾意男性，佢哋當中有啲係結咗婚有太太有仔女，有啲就細細個已經有着女仔衫嘅興趣，準備將來做變性手術，甚至有啲已經做咗變性手術㖭！」
洪朝豐續說：「佢哋搵我寫呢本書嘅目的，係想畀社會人士知道佢哋嘅心路歷程，帶出正面訊息，唔好再用有色眼鏡去睇佢哋。」
洪朝豐在訪問中又說：「就好似女仔着男仔衫，一般人唔係覺得咁大件事，但相反男仔着女仔衫就會覺得好奇怪好難接受，點解有雙重標準呢？佢哋平時都係一樣工作，一樣熱心公益之嘛！佢哋知我以前做過《性熱線》，比較自由開放，唔會對佢哋有偏見，所以咪搵我幫手囉。部份講到性生活嘅問題可能比較露骨，但唔露骨嘅話，人哋就好難明佢哋嘅心路歷程。」
早年洪朝豐曾應雜誌邀請穿着女裝拍照，但他強調對這方面沒有太大興趣，他說：「我冇變裝嘅喜好，反而覺得着男裝重方便。」
採訪：戴彩煥
