前晚天文台十點幾先至懸掛八號風球，一班藝人喺未掛八號風球之前，走去超級市場掃貨，做好一切打風準備。前晚七點鐘左右，馮仁昭首先見到陳豪同佢細佬喺跑馬地一間超級市場出現，佢哋買咗雞蛋、青瓜同青菜，大概逗留咗十分鐘就離開。
馮仁昭問陳豪係咪因為打風所以買定嘢？陳豪就笑笑口話：「唔係，買晚餐啫！」馮仁昭知道陳豪嚟緊會做瘦身公司嘅代言人，估計佢𠵱家已經開始減肥大計，所以食沙律做晚餐。
冇幾耐馮仁昭又喺超級市場見到謝天華，佢又買米又買酒，好似上倉咁款；而到咗夜晚九點左右，袁詠儀（靚靚）同張智霖亦都拍住拖出現，佢哋買咗薯片、紙包飲品同豬肉腸咁一大堆食物。不過，馮仁昭見靚靚塊面一撻撻白色嘢，唔知係咪曬到甩皮？亦都因為塊面唔靚，所以靚靚不時遮住塊面唔想見人。
廖碧兒噚日去銅鑼灣出席寶麗來「意想不到的驚喜」活動，同佢合演新劇《律政新人王》嘅麥浚龍（Juno），早前因樂壇貪污案被廉政公署拘捕，廖碧兒唔識中文，噚日有人開玩笑叫廖碧兒讓Juno請飲咖啡，廖碧兒竟然話：「好呀，我好鍾意飲咖啡。」事後廖碧兒知道係飲廉署咖啡時，佢即刻話：「唔好，我唔識呢啲嘢。」
有報道指章小蕙日前喺台灣，同前夫鍾鎮濤（阿B）坐低，傾談送囝囝嘉浚去美國升學嘅事。噚日章小蕙喺時裝店話：「佢（指阿B）坐低咗十分鐘啫，就俾人大做文章，我哋不過係傾吓對仔女嘅暑期活動，我諗住同對仔女去一次平民版嘅歐洲旅行，坐火車揹背囊，等佢哋捱吓苦嘛。」
無綫計劃出年開拍《戇夫成龍》續集，而喺第一集做阿旺老婆仔嘅宣萱，就話未收到通知，佢噚日喺將軍澳電視廣播城話：「開拍未必係一件好事，《戇夫》可以創一個十幾年嘅紀錄，係一個美好回憶，好值得回味，所以如果第二集冇第一集咁好，就會有啲失望。」
有傳話電影《少年阿虎》除咗韓星金賢珠做女主角外，重搵咗元斌或者張東健客串演金賢珠嘅前男友，但有消息話佢哋嫌戲份少唔嚟。但監製褟家珍話：「佢哋本來畀六月底嘅期，咁我哋又遲咗半個月先拍，所以先唔成事。」結果電影公司找來韓國樂壇人氣偶像金元俊頂替。
