計我羅拉話，尊尼仔六人組合KAN-TUN唔唱歌嘅話，真係可以轉行做冒牌人妖騷演員，皆因半年前，佢哋扮過哈利波特系列嘅主角後，fans拍晒掌嗌正。前兩日KAN-TUN食過翻尋味，個個扮女人教fans點樣同心儀男士相處，其中田中聖同赤西仁拍拖時迫爆衫洩春光，簡直笑爆我羅拉嘅肚皮！
KAN-TUN話追男仔最好嘅地方莫過於學校，你睇龜梨和美（龜梨和也）一見到靚仔赤西仁，即刻撇甩身邊好友，嗲聲嗲氣咁問赤西：「一齊返學好唔好啫？」電到赤西猛話好。
KAT-TUN話同暗戀嘅男士第一次約會，梗係要去遊樂場。睇吓赤西仁子（赤西仁）着條緊身裙，同中丸雄一拍拖，一時扮驚，一時唔覺意走光，令男人嗒晒糖。
和美妹上上吓堂手機響，本來佢想唔認，推落隔籬位個同學仔度，不過最後都決定跪地認錯，令靚仔田口淳之介老師對佢另眼相看。
呢個田中聖子（田中聖）墊大個胸，着住件小背心同男友去沙灘，咁性感嘅打扮，難怪周圍嘅男士即刻黐埋去同佢打場友誼賽，但係咁樣好容易激親自己個真命天子噃！