呢排報紙好多關於本地歌星嘅新聞，左丁山睇到個名，都唔知佢哋唱過乜嘢歌。公關靚女阿美突然來電：「喂，呢排我日日追緊Juno嘅新聞，突然阿姨叫我撲飛睇一個甚麼Feliciano演唱會，究竟呢位仁兄係乜東東？」
哈，左丁山唔清楚甚麼Juno噃，JoseFeliciano嘅CD就有兩三張，佢唱嗰首CaliforniaDreaming直情聽出耳油，其他如Rain,LightMyFire,QueSeraSera,Guantanamera,Don'tLettheSunCatchYourCrying等等都係紅極一時嘅流行曲。呢位仁兄係天生視障（盲人也），憑天才橫溢，唱出名堂，與另外兩位盲人歌星RayCharles,StevieWonder不相伯仲。聽完阿美嘅提醒，立即去查吓，知道佢八月九日晚在會展中心演唱一場，價錢分580元與380元兩種，睇嚟香港啲老鬼當晚會齊集會展，嘈番一晚勁嘅。
左丁山從JoseFeliciano想起香港嘅莊陳有，莊陳有係樂施會總幹事，捨政府AO而不為，乃係有理想之人。佢口齒伶俐。辯才無礙。淨係聽佢講嘢，一定唔信佢係盲人。Feliciano演唱會主辦人不如邀請莊陳有做嘉賓，請呢兩位天才戴住黑超高歌一曲，鼓勵視障人士奮鬥向上，不放棄，勤力讀書。難得Feliciano來港，莊陳有與佢嚟一場雙雄會，一定好令觀眾感動。