今個星期重頭作《首都高Battle01》由於有行貨，所以喺星期二已經見街，但係貨源比之前《頭文字D》少，好多地方都賣到成400蚊左右，今次行貨終於附有中文說明書，抵讚！
PS2同日重有隻2B級遊戲《EVE》，市價都係$350左右，另一隻賽車遊戲GC《F-ZeroGX》由於美國重未推出，好多貨都俾出口商掃晒，好多舖頭甚至收埋晒賣畀鬼佬，鬼咩！美國嗰邊賣成四百五蚊都有價有市，相反香港啲Game一過四百就得個擺字，都咪話唔灰。上星期GBA《我們的太陽》又再返貨，現價約$350，隻遊戲要曬住太陽玩，可算近年少見有新意嘅作品，大家不妨支持支持。
文：打機鐵人
前兩日米奇喺本報呻咗兩句，提起Game書封面期期一樣嘅問題，不過又唔怪得Game書，近年遊戲廠一係玩續集，一係就玩動漫改編，原創遊戲少之又少，咁報道遊戲嘅書又可以點？鐵人本身係任天堂支持者，有時真係唔明GC遊戲質素咁好，又肯花心思搞新意，但反應都咁少，賣得又咁差？究竟真係遊戲唔再好玩，定係人唔再玩遊戲？如果你認為遊戲唔再好玩，十大名作都令你提唔起興趣，不妨買部GC，再買隻《Pikmin》加埋《ViewtifulJoe》，相信閣下嘅睇法會有改變！
文：打機鐵人