颱風來勢洶洶，但過門不入，並無造成重大損害，莫非香港衰運已過？噚日港股遲開半小時，但到32分鐘先有價，全日表現都好反覆，恒指埋單9923，仍升22點，成交68億元。
國企股戰況好激烈，呢輪摩根大通係主力沽家，佢由低位揸上嚟，略為回吐好正常。當然，除大通外，亦有基金計賺錢數。不過，有人落車，亦有人上車，噚日就見到有唔少基金趁低位入市，午後更出現大撼大嘅場面，結果基金嘅獲利貨，亦畀基金食番晒。強手換強手，下一個浪，又有新話事人。
石化股全面回升，其實以PE計，大慶石化（362）係最吸引一隻，噚日高收0.485元，有2仙進帳，升幅4.3%。呢個月11日，股價突破0.39元的徘徊區阻力後，飆升到0.56元才出現調整，形成三角形，噚日見0.46元低位後反彈高收，成交回升，調整似已完成，一衝破0.5元的降軌阻力，上升目標指向0.67元。
大慶最近接到多單大工程，繼杭州灣大橋第一期工程防腐塗料合約後，又獲中石油（857）重型機械用潤滑油合約，現時則同內地汽車商傾緊增加潤滑油嘅定單，集團對呢個市場好樂觀，在收購上海大眾汽車主要潤滑油供應商大眾油品後，已計劃要擠身內地10大主要汽車製造商嘅第2大潤滑油品供應商，佔其各自需求量的35%至40%。
防腐塗料係大慶另一項重點發展項目，最近消息係同渤海重工葫蘆島造船廠合作的新廠，短期內將會投產，年產量15000噸，專供4家大型造船廠之用。中國防腐塗料市場非常龐大，尤其是海上專用防腐塗料，每年需求量超過30億元人民幣，集團已計劃在05年前，將防腐塗料佔營業額比重由30%提升到50%。
03年度（6月年結），大慶盈利估計有9000萬元，每股盈利10.2仙，現價計PE僅4.7倍。04年度，防腐塗料提供更大貢獻，而杭州灣大橋亦開始供貨，並有希望取得餘下工程的合約（防腐工程合約總值達10億元），保守估計盈利可上升至1.2億元，每股盈利13.5仙，以石化股保守PE6倍計，股價在今年底，可見0.8元。
郭兆誠