某天，出門口等𨋢等到發𤷪𤺧，接着等過隧道等到瞓着流口水，再去銅鑼灣人頭湧湧迫到幾乎扁，返到公司，筋疲力竭，開始發夢：如果我識飛，就唔使等紅綠燈、等過海、等搭𨋢！突然，電話響起，一把熟識的女聲說：「……可以飛……十一米！」
一聽到「飛」字，突然夢醒，原來她說：「喂，今個暑假有新嘢，玩野外飛索，可以喺十一米高飛落地面！」不管如何，能夠飛，夢想成真，一於看個究竟！
記者：梁佩芬 攝影：陳盛臣
Models：Yen、Blanche（SunSpot）、靜蓉、思俊及雪盈
原來，飛索是海洋公園最新的暑期免費玩意「今個暑假要玩『野』」的重頭戲。全部戶外進行夠晒「野」，這個名為「野外飛狐」的飛索玩意，是讓大家用繩索由11米高空滑落另一邊的地面，全長130呎，時間不足8秒。活動於今個星期六正式登場，先由我們打頭陣，第一時間滙報「飛狐」究竟有幾激？替我們率先玩「野」的，是Yen同Blanche，原來飛索有兩條，兩條高度不同，要是又怕怕又想玩，可以選低一點的飛索，好，就看看兩人的炎夏飛狐英姿！
玩到大叫大笑的Yen，要給大家激玩小貼士。「初初以為係俾人推出去嗰刻最驚，但愈嚟愈快，快到網嗰刻，我都不及閃避，就撞埋去啦！大家要醒少少。」
近年，大型吹氣遊戲非常流行，玩「野」樂園也有。受歡迎原因不外是可以循環再用，而且小孩大人都啱玩，就算跌落嚟都唔痛，非常安全。只見三位小孩爬高爬低，玩到滿頭大汗，都繼續又跑又跳。不過，風和日麗下，氣墊都曬到熱辣辣，又要除鞋先可以玩，尤其玩滑梯時，真係腳又㷫，PatPat又痛！玩完一輪，一樣曉「飛」，係熱到飛起！
做完飛狐，Yen意猶未盡，「橫掂着住套安全衣，不如一展身手玩氣墊攀石！」比起先前扮飛狐激到叫，氣墊遊戲已經變成小兒科，肯定要一爬到頂！
小飛龍是一隻充滿彈性的動物，任憑你在其肚裏拚命跳，都不會肚子痛。雪盈決心要與哥哥思俊跳餐飽！
跳完又跑，在50米長的氣墊內，你要一邊跑，一邊摸裏面的每一隻動物，如果身手敏捷點，更可以跳Over！
「最刺激係啲膠墊曬到好㷫，又要赤腳行上去，好熱，坐低重辣PatPat！」
除了爬高爬低，每日還有四節小丑表演時段，可欣賞變戲法之餘，更可學習小丑技藝，好似拋接球、轉碟等玩意！嫌在烈日當空下，玩到身水身汗太辛苦？倒不如在微涼的夜晚，聽聽陳奕迅、盧巧音、何韻詩及陳冠希的歌聲。八月二日起，逢星期六晚上，他們會輪流在海洋公園開小型狂野音樂會，又唱又跳，大消暑氣！
今個暑假要玩「野」
地點：海洋公園
開放日期：26/7-31/8 查詢：25520291