如果要數藝能界最大堆頭嘅「幫派」，尊尼事務所藝人認第一嘅話，第二就當然係以Morning娘為首嘅HelloProject啦。四十五個女仔排出嚟，個勢都咪話唔嚇人！咁多人有乜好玩呢？當然係可以開個自己友嘅運動會，大賺一筆啦！
素來只有尊尼藝人可以湊夠數，喺坐得落四萬幾人嘅TokyoDome開運動會，點知最近俾Morning娘借咗佢條橋，十一月喺OsakaDome同TokyoDome照辦煮碗開番兩場《HelloProjectSportsFestival2003》，成三百蚊港紙一張飛㗎，都唔知幾好賺。
不過話時話，尊尼運動會係畀班男士鬥man嘅，咁Morning娘成班女又有乜好搞？其實佢哋一早有晒預謀，之前喺佢哋嘅電視節目已經玩過短跑同打乒乓波等，聽講今次佢哋會集中玩有爆發力嘅跨欄同短跑，咁fans先會睇得high喎！
但大家最關心嘅，始終係最紅嘅松浦亞彌會入邊隊？聽講中澤裕子同保田圭分別做隊長，佢哋兩隊都爭松浦入隊，最後松浦揀咗中澤嗰隊。咁多人搶，難怪松浦都好得戚咁話：「讀書我就唔得啫，運動梗掂啦！」