本港企業做生意搵錢之餘，好多時會回饋社會，出錢甚至出力，幫助有需要嘅弱勢社群，有時對內地都會施以援手。新鴻基地產最近捐咗五十萬畀「淮河賑災行動」，幫助災民。
新地副主席郭炳聯話，早排內地同香港齊齊爆發非典型肺炎，中央堅持運批醫療物資落嚟畀香港用，今次內地有事，又點可以唔幫手呢？新地係第一家捐款嘅私人企業。聯少話，希望今次可以起帶頭作用，推動其他公司同市民踴躍捐款。
過去幾年，雖然經濟一年差過一年，但新地喺慈善捐款方面就有多冇少。零零/零一年度捐咗四千七百萬，零一/零二年度就係六千八百萬。
昨日三號風球高掛，影響賣樓活動。信和屯門海典軒原本今個禮拜六公開發售，不過「伊布都」來勢洶洶，中午過後開始橫風橫雨，唔多唔少會影響買家置業嘅雅興，所以決定延遲到下星期，日期待定。
信和營業部副總經理韓家輝話，八個公開發售單位，最平要九十三萬幾，平均呎價約一千六百蚊。另外，本周末中原送五千蚊寢室用品畀買家，名額五個。
和記黃埔地產嘅深圳黃埔雅苑四期駿悠園，喺六月二十一日搞咗個「我最喜愛的示範單位」選舉，本月十二日截止，收到幾千張投票，結果C型四房兩廳附連空中花園嘅「歐陸華庭」，成為業主同公眾最喜愛嘅示範單位。
呢個單位由原創坊嘅朱永康設計，面積一千八百二十五呎，最獨特係有特闊落地玻璃窗，重有一個超過一百方呎嘅全玻璃空中花園，份外尊貴，所以能喺六個示範單位中脫穎而出。
揀中呢個單位又被抽到嘅幸運兒，可以得到五千蚊人民幣家具禮券。
為咗成為市場焦點，唔少發展商都會搵明星幫手推介樓盤。
長實東涌映灣園，第一期搵嚟形象百變嘅賣樓主帥趙國雄參與廣播劇，並飾演護衞員。
今次宣傳，則搵嚟高級營業經理郭子威同劉啟文粉墨登場，同新城電台合作搞嘅四十集《都市情色》廣播劇，擔當地產經紀角色，重同人氣歌手許志安同陳慧琳做對手戲，負責sell樓。sell邊個樓盤？呼之欲出啦。
本港財赤嚴重，但係為咗刺激零售市道，政府實行「還錢於民」政策，退回部份稅款畀納稅人，希望大家用退款消費，以推動經濟。
納稅人已陸續收到退稅支票，最高可以收回三千蚊。筆錢話多唔多，話少唔少，九龍倉助理董事黃光耀話，既然筆錢係已出之錢，決定捐畀慈善機構。
麗新銅鑼灣廣場一期，現正放售，噚日麗新發展董事劉樹仁，出席集團荔枝角長沙灣廣場時裝批發廣場開幕酒會，當被問到銅鑼灣廣場一期進展，會唔會有機會喺截標前賣出，佢即時反問：「你知唔知道幾時可以追到女仔！」言下之意係物業好多人想要，但佢重未決定揀邊個。
銅鑼灣是港人消費熱點，又吸引大批遊客購物，銅鑼灣廣場一期位處購物核心區，劉樹仁用追女仔作比喻，蘭西認為，物業喺佢心目中一定係靚女，有意買嘅人士，一定要花多啲心思至有機會。
至於長沙灣廣場，啱啱翻新完成，裏面多咗個時裝批發廣場，有八十間舖，年租金二千五百萬，比之前多一倍。
蘭西
電郵地址：
