入廚20年的鄧太，自言煮餸唔夠老公耍家，尤其是老公拿手煎豬扒、牛扒，但自己就只會煮蔬菜同番茄，加上一家都是食肉獸，故她做的菜式從來不太受女兒歡迎！直至兩年前，鄧太不想家人餐餐都有肉無菜，加上坊間愈出愈多不同品種的菇類，於是，她靈機一觸來個大兜亂炒雜菇。
記者：吳佩璇
攝影：黃子偉
鄧太一家素來愛大魚大肉，晚飯斬料更是家常便飯。年前，鄧太與大女兒Carrie想減肥，便開始吃得清淡一點，奈何Carrie完全不喜歡食菜，才給鄧太誤打誤撞，自創了炒雜菇和煮雜齋等另類素食。說是另類，全因她們始終戒不掉嗜肉心理，還是要加入雞湯底及蠔油來吊味。然而抱住減肥心態嘅齋戒期始終不持久，直至SARS爆發，當護士的Carrie剛好在重災區威院8A病房當值，鄧太終日憂心忡忡，煮甚麼菜式都勁落蒜頭外，其自創的炒雜菇更一星期煮足三、四晚，迫住餐餐都要飲食均衡。斬料？鄧太話：「幾個月無斬過叉燒喇！」
鄧太話以往只識煮草菇炒牛肉，但後來發現街巿愈出愈多不同品種的菇類，便一次過掃齊幾種菇返屋企炒埋一碟。不同品種的菇夾埋，口味都算夾，加上材料又可隨意配搭，連買餸錢都有彈性。為免「食七」唔吉利，鄧太便買6種菇煮埋一齊，但讀者不妨按自己喜好來加減菇的種類。平時帶開飯盒返工的Carrie，更大讚此餸叮熱之後依然爽口，不會變質。
用咩料：
秀珍菇2両、雞髀菇1隻、豬肚菇2隻、草菇2両、茶樹菇2両、靈芝菇2両
食髓知味，鄧太再利用冬菇，加入其他如枝竹、木耳等材料做炒雜齋。為補償家人吃少了肉，這道雜齋並非一般羅漢齋，而是按家中各人口味來選材料。鄧太鍾意食枝竹、豆卜；老公喜歡金針；大女Carrie至愛銀杏及雪耳；二女CoCo則愛吃木耳和雲耳──這道菜就是這樣給炮製出來的。
用咩料：
銀杏5-6粒、雪耳3棵、雲耳3棵、冬菇5隻、枝竹1條、豆卜5個、木耳3棵、粟米芯及金針各少許（約10多條）
本來富善街巿是最近鄧太屋企的街巿，但她嫌那裏的餸菜價錢略貴，寧願多走10分鐘路，到稍遠的翠屏街巿。鄧太話翠屏街巿在大埔區來說算得上幾抵買，特別是魚，$20已可買到一條游水魚，比同區其他街巿平約$5。另外，菜及生果亦是抵買之選。