美股急升，未能帶動港股，恒指又跌108點，3日計埋，唔見240點。睇情況，恒指可能下試9800，重有100點下跌空間。
升幅最大嘅股隻係亞洲鋼鐵（8080），收25仙，飛升87%。升幅最大嘅窩輪，係亞鋼公司輪8356，由3.1仙跳上9.7仙，升幅213%。8356幾乎重有兩年壽命，行使價10仙，計落有負溢價21%，但槓桿率得2.6倍。亞鋼屬萬順昌（1001）成員，呢系公司耐唔中會發神經，狂升暴跌，未必有乜新聞。8356雖然有折讓，都唔係一般人所啱買嘅，贏咗唔知乜事，輸咗亦唔知乜事。
中石油（857）大概因為隔晚美國油價下跌，加上獲利貨流出市場，跌7.5仙，收2.15元。中石油條件優越，有機會由低位反彈，不妨小注博Call輪9797，隻輪夠晒長命，明年中至夠鐘，昨收55仙，跌5仙，溢價3.7%，槓桿率3.9倍。
和黃（013）微跌1格，收50元，Put輪9752收2.6仙，彈升24%，打入龍虎榜。隻輪下月底前夠鐘，溢價10.5%，槓桿率192倍，行使價45元，正股跌唔夠5元，隻輪會作廢，估計最後作廢機會好大。
個市如果再跌，可以考慮逐少逐少買恒指Call輪博反彈，對象有幾件，例如9785、9749、9859，幾乎件件都有好勁波幅。
章盛