特區六年，劣績有目共睹，但董政權未算「一事無成」，例如安插親信霸位，就做得幾成功。最新傑作，咪就係搵退休法官王見秋取代胡紅玉掌平機會；至於馮華健接替梁乃鵬掌廣管局，之後警告商台鄭大班，真係深慶得人呢。
八方聞說董建華當年上任不久，有好多人向佢打小報告，話陳四萬之所以大權在握，係因為所有諮詢組織同公營機構嘅阿頭都係佢嘅人，所以冇人敢反佢。後來阿松都好信呢一套，故此同老董一齊全力剿滅陳太以及港英「餘孽」。
而講到王、馮呢班法界俊傑，一位法律界嘅人士笑說，佢哋嘅界別老董只信幾個人，第一個梗係梁愛詩司長，其次就係坐喺行會嘅廖長城，然後就係政壇新貴兩位新政協胡漢清同埋馮華健，所以胡漢清繼續做證券及期貨事務上訴委員會主席，而馮公子就掌廣播事務管理局。
現在呢張名單，可能加多一個：王見秋。
傳真︰2623-9278
電郵︰