三人男子組合E-Kids的成員Tommy、Alan和Tim小時候均非常頑皮，Tommy與哥哥曾說謊騙媽咪兼偷父親錢打機，Alan就喜歡拆開電器研究，而Tim竟經常謀殺小動物！
男子組合E-Kids的成員Tommy、Alan和Tim的家庭背景不同，但卻有個共通點，就是頑皮！不過自從三人加入娛樂圈後，就體會到父母賺錢養家是如何辛苦，現在回想起小時候的頑皮劣行，更感受到父母的勞心勞力。
Tommy是家中孻仔，他表示跟兩個哥哥均非常頑皮，他日前說：「細個阿媽管得我哋好嚴，好少畀錢我哋，更加唔畀出街，嗰時我哋三兄弟好鍾意打機，特別係打『泡泡龍』，八歲時試過偷阿爸儲埋嘅皇冠頭五毫子出街打機，結果阿媽返屋企唔見我哋，梗係大興問罪之師啦！我哋重呃阿媽話，有個叔叔打電話嚟約咗佢，叫我哋落街幫佢攞嘢，原本諗住實俾阿媽打，點知搞到阿媽好擔心，重安慰番我哋。」
而Alan是家中長子，九歲前與湊大他的婆婆一起生活，他說：「我有一個細我一年嘅妹妹，由於九歲先返屋企同父母住，感覺梗係陌生啲。我細個最鍾意拆開啲電器嚟研究，試過有次拆開部walkman嚟研究，結果唔識嵌番，俾阿媽打到飛起，不過到𠵱家我都係咁好鍾意拆開啲電器研究。」
Tim則有一姊一妹，是家中獨子，他自小已喜歡研究小動物，Tim說：「可能屋企得我一個男仔，我細個都係自己一個玩動物同昆蟲，最鍾意摺紙盒養草猛、蝴蝶同蟻，又試過養雀，不過養乜都死，我都謀殺咗唔少小生命㗎。」
採訪：卓美娟
