早輪，因為市場氣氛唔好，原本等新Showroom開張，兼且推出全新Phantom跟車迷見面嘅勞斯萊斯新代理，終於落實響今個月底（7月30日），隆而重之咁跟香港廣大車迷會面喇！而亞Mark早前曾經同大家提過，話勞斯萊斯響中環心臟地帶，重係達官貴人同政客經常出入嘅地區開設新陳列室，對推廣部全新Phantom豪華轎車，會大收事半功倍之效，真係無往而不利㗎！再者，早前平治Maybach車系跟淺水灣個咁豪嘅Showroom，正式登場及開幕後，Maybach57同Maybach62定價分別係570萬和685萬亦經已落實，聽聞新任勞斯萊斯掌舵人JohnWong，經過一番盤算後，決定將呢部新Phantom定價於545萬上落，無疑較前者兩款Maybach型號，都來得有號召力，加上重有Rolls-Royce嘅品牌做Back-up嘛！