德國《踢球者》雜誌踢爆阿仙奴即將會簽入多蒙特龍門列文，我求大俠一聽到呢個消息即刻打個突，雖則話兵工廠唔夠龍門用，但都唔使慘到要斟呢個躁狂龍門啩？我諗你問十個阿仙奴球迷，至少有九個都希望係《踢球者》吹水。
由列文當年踢AC米蘭時毆打對手，我就開始留意呢個龍門，我唔敢話佢技術唔好，但就專惹麻煩：每季梗有一兩次被趕出場、周不時就同隊友鬧吓交。聽講多蒙特為佢叫價二百五十萬鎊，如果阿仙奴真係肯出呢個價，多蒙特肯定𦧲飯應；梗係啦，列文已經三十三歲，多蒙特年輕龍門維丹費拿亦有足夠能力接棒，即管睇吓阿仙奴會唔會飢不擇食啦。
前日拜仁響聯賽盃苦戰迫和漢堡三比三，讓一球上盤客當然一頸血，不過我哋名家青蛙仔就照中冇失威。經此一役，唔知「八．一」拜仁對法蘭克福啲飛重會唔會聚埋拜仁度呢？場波最後拜仁射輸十二碼，響法定時間入兩個十二碼嘅波勒，去到互射十二碼時就宴客，腳軟乎？
響俄羅斯巨富阿巴莫域治入主車路士前，查爾頓中場柏加本來好有機會加盟車路士，當時重傳到佢過檔後周薪倍增至三萬鎊。據講，柏加諗住薪酬急升，於是一擲千金買入價值十六萬鎊嘅占士邦愛車雅士東馬田，𠵱家轉會好夢成空，揸住呢份自己送畀自己嘅禮物，肯定哭笑不得。
不來梅今季轉換球衣，沿用傳統綠色為主色，但袖就改為橙色。波衫一曝光即刻劣評如潮，幾乎所有球迷都批評新設計冇品味；德國傳媒甚至形容球員着住呢件衫比賽，就會似一群鸚鵡響球場度走嚟走去。不來梅高層死撐新球衣吸引，咁唔聽取民意，小心引發大規模示威至好。
我求大俠啱啱至提過曼城班拿比亞決定掛靴，言猶在耳，嚟自中東消息話，原來佢話退休係假，旨在同會方解約，自由自在轉投卡塔爾球隊掘金。冇人知點解班拿比亞轉軚轉得咁快，不過如果佢動機不純，當初話退隱其實係想斬斷同曼城嘅關係，呢樣嘢就唔值得鼓勵囉。