英國首相貝理雅為咗避「風」頭，提早一日離開香港返倫敦，原定同香港行政立法兩會議員的會面，都要臨時取消，激到民主黨前主席馬丁李柱銘紮紮跳。
李柱銘話香港掛緊三號風球，但係倫敦就吹緊政治十號風球，武器專家凱利之死搞到貝理雅一身蟻。但佢話貝理雅唔抵可憐，因為佢重財輕政，訪港得咁少時間，都去見董建華同埋阿董個「老細」──即係李嘉誠（呢句係馬丁講嘅），中午又出席英商會午宴，完全當香港政界冇到。馬丁話為咗見首相，一早準備咗好多資料同意見，家陣可能要變成公開信咁發表，益咗《蘋果》評論版。
貝理雅呢次訪港，行程又真係幾趕，噚日佢見完阿董同李嘉誠，中午十二點五十分去到港島香格里拉，竟然唔係入去宴會廳參加午宴，而係去咗隔籬「夏宮」貴賓房食中菜，食咗半個鐘先至返入宴會廳，一上台就講嘢，講完即走，飛車去機場坐三點鐘機。
貝理雅同隨行人員行動迅速，並不張揚。「夏宮」照常開放，八方同朋友一樣可以坐低食飯，只係唔知自己係咪有特工昅住。一個出席英商會午宴嘅商界朋友重同八方講：「做首相真係辛苦，連飯都冇得食。」原來大家都唔知佢已經在隔籬「打咗底」。
傳真︰2623-9278
電郵︰