梁漢文自從年前喺「新城頒獎禮」爛咗個獎之後，似患咗爛獎恐懼症，早前攞《勁歌》獎，個獎係可以分開，佢又以為爛咗，點知佢前晚喺廣州攞廣州電視台《勁歌王季選》嘅「金曲獎」同「省港傑出歌手獎」時，個獎又爛咗，真係邪。
當時梁漢文一邊唱歌一邊踎低執番個獎嘅殘骸，點知又跌多次，搞到佢好尷尬，Shine睇到即刻遞個獎畀佢揸住先。梁漢文表演完返到後台即慘叫：「我已經第二次爛獎呀！」
除咗梁漢文之外，余文樂兩個獎都係爛晒，但佢就好開心將啲碎片塞入梁漢文衫袋裏面。事後梁漢文話：「原來個獎係玻璃造，個底係咁易焊一焊㗎咋，我拎拎吓就爛咗，好彩大會話會整番好個獎再寄番畀我哋。」
MiniCookies前日去廣州綵排時，成員Theresa整親隻腳，要即時噴止痛噴霧。另外曾傳緋聞嘅Miki同Shine嘅天佑竟然擦身而過扮見唔到，冇打招呼，反而方力申同2R嘅Rosanne就大方得多，前日2R嘅爸爸去睇兩個女領獎，Rosanne重介紹老竇畀方力申識㖭。
黎瑞恩日前喺九龍法國醫院生咗BB女之後，一直都未有露面，連日嚟都有記者喺醫院守候。噚日中午時有傳黎瑞恩從後門秘密出院，記者就立刻去到佢老公位於九龍塘嘅曾家大宅，結果見到黎瑞恩嘅爸爸媽媽喺曾家出入，相信黎瑞恩經已秘密返到屋企休息。
森美上個禮拜五主持商台節目《森美小儀山寨王》時，俾觀眾投訴喺節目度爆粗，噚日森美如常返電台主持節目，但佢就強調話：「我堅持我冇講過粗俗說話，因為我講嘢快食咗啲字音先俾人誤會，而且聲音經過電腦壓縮之後，喺網上聽時會怪咗少少。暫時我哋都冇收到廣管局任何通知，不過我以後咬字會更清晰。」
岑建勳噚日以演藝人身份出席中環舉行嘅「淮河賑災行動」記者會，佢話已經發咗電郵畀九大屬會同電子傳媒，準備下個月搞一個大型賑災籌款活動。佢重話呢次活動令佢諗起九一華東水災時，演藝界嘅團結精神，結果籌到一億一千萬，今個禮拜佢會同演藝界開會討論籌款方案，再決定用乜嘢形式去搞。
馬浚偉之前推出嘅唱片銷量成績叫好，重憑《錯認》得到廣州電視台勁歌台嘅「最佳改編歌曲演繹獎」，前日佢親身去到廣州領獎時，佢嘅忠實歌迷重特別組團到廣州支持佢，喺現場不斷歡呼，重拉晒橫額幫偶像造勢，令馬浚偉十分開心。
