颱風伊布都逼近，個個都諗住幾時可以放工休息，魚缸內好多人都無心戀戰，唔理得1萬點關係咪失守。e莉莎重衰，趁住冇乜盤做兼老闆不在，提早成個鐘蛇去搶購糧食，今時今日咁嘅工作態度確係唔要得。由於今日正常開市機會唔大，大戶噚日紛紛平好倉，現貨則以沽盤為主。恒指收報9900點，跌108點，成交88.444億元。
德永佳（321）公布完業績即遇強大沽壓，收報6.15元，跌8.2%，成交增至4941萬元。論業績，全年純利增長11.4%至5.91億元，每股賺44.6仙，派息14仙；即PE13.8倍，連中期息計息率有4.1厘，表現都算不俗，不過仍被指業績遜於預期，觸發大量沽盤。據聞，上次以每股5.90元接咗6600萬股嘅炒家，見炒極都唔上，已經意興闌珊。
嘉里建設（683）復牌後一度挫逾7%，其後跌幅收窄至2.4%，收8.15元。嘉里守住8字頭，其實已算硬淨。黑客話，由於公布私有化至今，地產股升幅唔細，所以嘉里就算冇私有化計劃，股價亦應企於7元以上，如果沽盤消化得七七八八，股價有機會重上9.50元私有化定價。
21世紀通（241）將落實投資國內電訊增值業務，兼獲北京中信增持。不過，大市氣氛唔好，復牌後股價唔知識唔識升？噚日停牌前，股價一度急挫17%，低見0.57元，其後有大買盤接貨，將股價推回至0.63元，跌幅收窄至8.7%，半日成交3900萬元。
阿虎