不得不佩服Logitech嘅創意，鍵盤同滑鼠，密密換款之餘，重不斷加入新功能，剛舉行嘅發布會除正式宣布踩入HandsFree界，重展示一堆新款滑鼠同鍵盤，以新嘅Click!技術技壓全場。
記者、攝影：徐影龍
代理：恒昌電子
銷售熱線：21111488
發布會不但請嚟趙頌如同鄧肇欣等藝人即場試玩，重專登搵兩名比堅尼美女，以Catwalk形式介紹一系列新產品，雖然當日一號風球兼落緊雨，移師酒店內仍令到場傳媒感到陣陣透心涼。最可惜係大部份產品都未定價錢，甚至連出街日期亦無公布。
最搶眼產品係加入新技術Click!嘅滑鼠系列，成個系列暫定有三款型號登場，全以金屬銀為主色，保留流線型外殼，不論左、右手長時間使用都冇咁易攰，符合人體工學設計。Click!全線滑鼠放棄傳統滾球，全部換上至Update嘅光學式操作，最有特色係首度加入Click!按掣，不論桌面同時開啟幾多個工作視窗，只需一按就可迅速轉換視窗。好多用家同時開啟《IE》、《Outlook》、《ICQ》、《Excel》，有咗Click!掣之後，連郁滑鼠嘅時間都慳番，工作更靈活兼得心應手。
RF無線技術及光學原理，除Click!外重額外多兩個瀏覽器按掣，一隻手指公就可捲動網頁，懶人至啱。
除欠缺網頁捲動按掣外，功能上跟Plus版差不多，不過全銀色賣相就更為吸引。
OpticalMouse
唯一一款Click!系列嘅有線版本，同樣有齊Click!按掣同光學原理，外形亦不俗，估計賣價稍平。
一堆新產品中，鍵盤只係陪襯品，新型號重要夾埋滑鼠以套裝推出。呢款CordlessMXDuo可謂富貴級組合，成個套裝用盡Logitech所有貴價靚料，功能亦屬最強。鍵盤頂部十幾個功能快捷鍵已夠誇張，不論開啟程式或調校MP3音量，都咁輕鬆自在，官方強調嘅「零風阻」設計雖則有點無聊，不過鍵盤體積真係幾纖薄輕巧。最正係個無線光學滑鼠MX700，特長六呎有效接收範圍外，其FastRFCordless技術特別針對快速移動之用，如打機或繪圖等，隻手幾快都跟到。MX700另設充電座，唔用時放喺上面順便充電，免卻定時換電嘅煩惱。
Logitech首度進軍手機免提市場，五款型號大軍壓境，誓要先聲奪人。當中只有一款為無線HandsFree，外形相當不俗，實地測試夾耳位頗為靈活，簡單掛耳後，一段時間都唔覺唔舒服。可惜暫時只知採用藍芽無線技術，其他資料如附加功能、賣價同推出日期都未定。
其餘HandsFree雖屬有線免提款式，不過都喺功能同外形上花過心思，如自動捲線設計、快速功能鍵、多種尺碼等，舒適指數亦頗高，只要價錢合理，相信可成功晉身HandsFree界。