睇報紙，泰國掃黃掃毒，雷厲風行，似乎好有成績，但泰國警察在總理「他信」默許之下，行事好似美國電影啲警察行刑隊，用武力太甚，已經殺死唔少嫌疑毒犯，引起國際人權組織關注。至於掃黃方面，就冚咗唔少娛樂場所，居然引起一位老闆大爆料，公開指警察受賄。
啱啱呢日碰到泰國通，問佢：「泰國人慣晒沖涼，警察狂冚按摩場，豈非倒米？」泰國通話：「泰國搞政治啫，嗰位爆料老闆擁有七八間按摩場，佢一向任由啲警察抽水，警務人員入到佢啲場飲食沖涼，從不收錢，呢個遊戲規則，彼此遵守，相安無事。但最近一位自北方調派到曼谷嘅警官執到呢位老闆痛腳（又唔知遊戲規則嘅存在），就係按摩場內供應十六歲以下嘅緬甸女孩，於是大巴掌冚落去，老闆唔順氣，於是公開爆料話警察收規，實行累鬥累，都唔知點收科咯。」
咁政治角度又點睇？原來呢位老闆與泰國某黨有交情，有三四十位議員支持。當局想掹晒啲議員過嚟，於是打起掃黃旗號。如果同情老闆嘅議員肯歸邊，以後就舞照跳，涼照沖！按摩沖涼都與政治有關，平民百姓如果唔在政治上發言、投票，好易俾人賣豬仔啫。泰國通話某國大老闆與兩個屬地主管講起掃黃，主管T猛話應該應該，返到屬地就叫警察橫掃最旺嘅角落，雞飛狗走。主管H聽聽吓就話頭痛肚痛，去咗廁所唔再聽落去，返到屬地，官員報告鄰埠主管T大力掃黃，使唔使照跟，主管H話：「我冇聽過有此事喎，一切照舊！」於是該地夜生活照常。主管H唔做事而民望高，主管T努力而不討好，你話點解？