昨日橫風橫雨，小初諗住大家都冇心機炒股，未收市就打電話畀經紀陳，叫佢約埋班老友開檯打麻雀，但佢竟然叫小初唔好阻住晒，原來佢喺度吼住股價勁跌嘅漢登（448），重話隻股應該未有咁快玩完。
前身叫雅佳嘅漢登，近排走勢凌厲，由1.3仙一條氣炒上去最高3.5仙，先至出現調整。噚日突然出現大量沽盤，最低插到去1.8仙，收1.9仙，大跌17%，有貨真係嚇餐死。但收市後，漢登公布全年業績，業績正到暈，盈利有成976.5萬美元，勁升1129.8%，兼夾有股息派。
經紀陳話，隻股由仙幾炒上嚟，期間出現大量大手成交，唔係一般炒作咁簡單，噚日嘅沽盤，其實係預料之內，如果小初想跟炒，最好縳定安全帶先至上車。
另外，Juno老竇嘅中建電訊（138），一門三傑噚日復牌，股價急跌已係意料中事。
經紀陳話，海爾中建（1169）比較無辜，隻股一早已轉為由大陸炒家揸旗，所以3間公司中，最有機會大反彈係佢。
慕容小初