天文台一早發出預警，令人先入為主以為颱風伊布都好快殺到嚟，亦間接幫咗趙飛雲唔使損手。
美股周三晚及時回升，但噚日恒指高開後迅速回落，在9960-9980窄幅上落，不過期指5分鐘圖、15分鐘圖及小時圖均出現底背馳利好訊號，平時趙飛雲已撲入買恒指Call輪短炒，但由於噚日諗住港股就算即日唔停市，今日亦會停市，所以作罷，否則已跌入走勢陷阱。
恒指午市一度衝破上午橫行區頂部，大戶引人入局後即重手質落，恒指以接近全日低位9900收市，下跌108點。
恒指周一應升未升後已連跌3日，噚日雖險守20日線及升軌收市，但10日線再度回落，而20日線及升軌不斷上移，跌破的機會相應增加，失守後下一站將試50日線9677。
港股今次升浪，由4月低位8331升至上周三高位10236，共升1905點，若調整升幅0.382，支持位在9508；若調整0.5，支持位在9283。因此港股若確認展開調整，造淡買Put輪有一定值博率。
另方面，亦要考慮美股既能及時反彈，恒指跌至20日線亦可能先出現反彈，候恒指反彈近10日線受壓或確認跌穿20日線才買入Put輪，比較穩妥。
昨日尾市沽出北京首都機場（694），主要國企股氣氛差，同時亦防跌市持續，故進行減磅。
趙飛雲