紅軍訪港招風雨<br>球驗客手記:黃牛黨隨時斷米路

紅軍訪港招風雨
球驗客手記:黃牛黨隨時斷米路

雲南大姚縣地震,我哋睇波嘅自然會擔心影響到皇馬喺昆明嘅集訓計劃。遠嘅唔講,講啲切身啲嘅,颱風伊布都已經吹襲本港,來勢洶洶,至怕影響到利物浦嘅訪港之旅。貴人嚟到招風雨,想炒飛嘅黃牛黨唔使旨意得逞囉。
天文台預測,伊布都威力好大,見報時天氣會顯著轉壞,有機會掛八號風球㖭。所謂「打風唔成三日雨」,就算風打唔成亦唔慌會好天,撞啱紅軍後日抵港,禮拜日比賽,希望呢位風大哥快啲走,等買咗飛嘅朋友可以安心。據我求大俠所知,呢場波門票已賣得八八九九,有人想炒飛都唔定,睇怕呢場風雨會斷佢哋米路嘞!

嚴防皇馬女球迷裸跑
雲南紅塔正密鑼緊鼓,準備迎接周五到埗嘅皇馬,更安排娛樂節目畀眾球星,包括大象表現等。另外,皇馬訓練期間會採取嚴厲保安措施,但奇怪嘅係將禁止女球迷裸跑列為頭號高度重視突發情況。我求大俠雖然知好多女球迷瘋狂迷戀碧咸,之不過中國女球迷會唔會咁出位先?

皇馬唔簽米列圖
皇馬以米列圖膝部舊患未愈為理由,取消呢宗轉會。我求大俠一聽到就覺得意外,或者佢係有舊患,但每季都為獨立隊踢好多場波;響國家隊,連用人好似走馬看花嘅比爾沙都用佢,點睇都唔似有問題,真係唔知葫蘆賣咩藥啦。肯定嘅係,皇馬後防唔夠人,有前冇後都幾牙煙。

阿柏天尼投拉素衰唔晒
阿柏天尼俾AC米蘭換咗去拉素,同球會長達十五年嘅賓主情誼一朝了,走得唔多開心。我求大俠一方面為佢歎息,但從好嘅角度諗,與其留響度做人球,倒不如加盟實力唔錯嘅拉素。睇吓史譚同埋米赫洛域,都係響文仙尼麾下鹹魚翻生,話唔定下一個輪到阿柏天尼呢。

班拿比亞睇化人生
曼城隊長班拿比亞突然宣布退休,理由係覺得體能已經無法應付英超聯頻密賽程,今次決定搞到領隊基瑾組軍方面失預算;基瑾認為,班拿比亞受到科爾猝死關係,睇化人生才決定高掛球靴。我求大俠認為,既然球員唔想再踢,勉強要佢留隊都無用,所以基瑾呢次大方畀佢走都係啱嘅。