潮流Express:㗎仔追捧NewBalance<br>型絕MT「三個五」靚盡波鞋街

潮流Express:㗎仔追捧NewBalance
型絕MT「三個五」靚盡波鞋街

月前小弟鄭重聲明,要留意8月推出的日版NB新秘密武器──MT「三個五」,講得如此肉緊,因為「三個五」係NB歷年來玩Colour玩得有型最靚嘅代表作(可能鞋迷會Objection,HECTIC版唔靚過佢咩?老實講,名氣大於一切!)!然而8月還未到,水貨已搶閘彈出!月前預測「三個五」開價約$900,結果開盤只需$880,算係有良心!講番今個禮拜市場動向,NB「五系」依然停不了,食住HECTIC版之勢,原汁原味美版580居然有貨流入Market,作價更Mark到$1,800,天咁高!

記者:陳嘉文 攝影:陳偉強

型爆!
「鴨屎綠」MT-555
繼日版「五七五」贏了口碑後,㗎仔最新力作喚作「三個五」,賣點一如前作勁玩OutdoorFeel,而襯色方面更改以三隻顏色作配襯,主色採用「鴨屎綠」襯淺灰及粉藍,戶外味異常濃郁。而鞋底設計一樣重料——強化的ENCAP底。

姣震!
「姣婆紫」MT-555

HECTIC版效應!
美版580重現江湖!
90's生產的NB美版580,查實共兩隻Colour,分別為圖中的藍×灰及已絕版的紅×灰。面對重現江湖炒至$1,800的美版580。小弟又要講古,話說約8年前,呢對鞋喺波鞋街根本冇人吼,價位由$500幾滑落至$300多依然無人問津,眼見咁抵即時貪過癮試吓,感覺係勁舒服!重有,用家心得:買美版580要Keep住成日着,錫住佢唔着會易氧化兼甩底!

鞋迷Ken:MT580第三代再炒高
Ken仔100%HECTIC版580「Fan屎」,面對兩代580佢有以下見解:「Nike別注版以外,在市場能炒至$4,000的波鞋可謂寥寥可數,要數其他炒到飛起的Crossover波鞋,非MT580第3代莫屬。呢對勁鞋往績輝煌,特別係3代的HECTIC×MITA×NB版本,兩個月前在市場還見到的灰×紫及啡×紫賣價企穩$4,580,不過轉頭竟完全消失於空氣中,唔少波鞋「二五仔」話對鞋重有得升,故班水貨佬實行「封盤」唔賣住。今日MT580第3代終於解封,再創新高$4,900!巴閉!」

一周熱辣情報
EricHaze「優質燈」Hi-cut水貨到!
講最熱爆的Nike款,點可以唔講Gimmick得可以的Haze「優質燈」,喚作EricHaze×NikeDunkPremium共有兩個版本,分別為圖中的普及版及限量版,兩者同樣在鞋身勁玩Graffiti的漸變色噴墨元素;而限產250對的巴閉版,則在鞋舌位繡上HAZE字。

鞋迷反愛Lo-cut!
拍攝當日,鞋迷Joe仔亦對Haze「優質燈」情有獨鍾,於是乎試完Hi-cut又試Lo-cut,最後答案都係買Lo-cut,因為比較易襯衫咁話。

祖雲達斯×Nike「蠶蟲仔」限量版
噱頭計劃依然停不了!「蠶蟲仔」繼有atmos版後又有大搞作,今勻合作對象竟是祖雲達斯!襯色更是祖雲達斯的TrademarkColour黑白配搭。而話明係祖雲達斯別注版,當然繡有兩粒金星的球隊標記。

北卡漆皮「佐敦1」
Jordan大名真係長玩長有,特別係「佐敦1」。最新製作玩北卡漆皮──北卡藍×白Colour,漆皮製造,重要加埋個閃到暈Jordan雷射商標;Wow!認真夠噱頭!

售賣點:
(a)GeorgeTownSports(23323026)旺角瓊華中心3樓320舖
(b)HeadCoach(27710163)旺角瓊華中心2樓209舖
(c)TheBest(27707444)旺角瓊華中心2樓203A舖
(d)HotChannel(23844782)旺角瓊華中心3樓311舖
(e)Misa(23743899)旺角瓊華中心3樓303A舖