大生銀行家族成員馬清揚的太太錢慧儀，懷了身孕，預產期為八月，但上周突然作動，急進入養和醫院開刀剖腹誕下女嬰，她在醫院休養數天後，昨日才出院回家休息。現在擁有二子一女的錢慧儀，正式宣布收工，她又表示BB女很乖，不會扭計。
社交圈傳來喜事，大生銀行家族成員馬清揚的太太錢慧儀早產誕下女嬰，昨日記者致電恭賀她時，她表示昨日剛出院返家休息，錢慧儀說：「我呢胎嘅預產期本來係八月，BB應該同我同屬獅子座嘅，我上個禮拜四重如常返工，點知突然陣痛，BB女喺上個禮拜五（十八日）就出世。」
錢慧儀又說：「我生三胎都係搵同一個醫生嘅，就係養和嘅婦產科醫生梁淑德（即周梁淑怡胞妹），呢胎係開刀生，留低咗條小小嘅疤痕，不過應該重可以着比堅尼嘅。」
錢慧儀透露女兒十分健康，重七磅多，問她BB女像她還是像丈夫？她說：「BB女似爹哋多啲，佢個名會跟族譜排個『桂』字，英文名就由我哋兩夫婦改，唔會搵相士㗎啦。」
昨日錢慧儀又表示現有二子一女，正式宣布收工。問她首次湊女，跟湊仔有甚麼不同？她說：「BB女乖啲，佢食飽就瞓，佢兩個哥哥以前食飽重要同佢玩一餐先。」但她表示因懷孕時皮膚敏感，須塗防敏感藥，所以醫生建議她不可餵人奶。
錢慧儀更稱得上是個fitfit媽咪，懷孕以來只重了二十多磅，她表示產後不會往美容院纖體，只靠運動便可回復產前身形，她說：「生到第三胎都有啲經驗嘅，就係佗BB時一個禮拜飲兩次奶就夠，飲太多會肥。另外，飲果汁都會肥，直接食生果最好，每日食兩羹燕窩，重要戒食羊同魚生。𠵱家產後我都會盡量做一啲中國嘅習俗，就係用薑水沖涼，希望忍到唔洗頭住啦。」
採訪：RitaLeung
