近日見親人，都係問究竟邊個做財政司司長，坊間唱得最熱嘅係金管局行政總裁任志剛同機管局主席馮國經。任總梗係夠晒班，不過，要佢減超過一半人工，又可以畀番乜嘢補償呢？據八方所知，任總呢幾日放假不在港，係故意避開還是另有任務，老友冇人肯講，只知佢並非上京。
至於馮國經，如果佢做股市實升。但有知情人叫八方勿太主觀願望。馮家咁大生意，係大老闆唔係夥計；而且再空降人入政府，似乎不符總理「穩定、團結」之旨。
除咗任馮，另一個識做財司嘅當然係煲呔曾，佢雖然冇乜嘢做，但係住緊間VictoriaHouse好過癮，點肯輕易放棄恩賜？除非阿董攞支槍指住佢，或者畀佢𢭃兩份人工。
許仕仁現在亦冇嘢做，但許老爺咁辛苦先逃離老董魔掌投靠馬會夏佳理，點會肯再入侯門？鄺其志就更慳番啖氣，佢已經開咪唱對台戲，老董邊有咁嘅容人器量。
到目前為止，葉澍堃同唐英年已表態話咪搞，但八月一號前應該要敲定人選；肯為老董犧牲嘅人買少見少，可能只剩低一個中央政策組前首席顧問鄭維健，以及唔做財司亦可任保安局局長嘅梁定邦。八方忽然諗起九鐵行政總裁楊啟彥，佢老哥最夠資格，既做過庫務司，又打過私人同公營機構嘅工，而且就快約滿，點知一問楊官，佢馬上耍手兼擰頭話，「你想我俾老婆鬧死？西鐵一通車我就退休去也，noeyesee。」
傳真︰2623-9278
電郵︰
