有市民前往豐澤電器店購買打印機，職員聲稱其所購打印機可獲原廠上門保養，但兩個月後，打印機出現問題，始揭發原來其所購機款，根本不獲原廠保養，他不滿豐澤職員以原廠提供上門保養作招徠，誤導顧客。
「起初就肯定有原廠上門保養，後來又話原來冇，到最後竟然答話其實係有，不過就唔包我買嗰隻喎，咁即係點呢？」朱先生指早前往豐澤購買打印機，最終卻換來一肚子氣。
朱先生表示，本年五月底，他到銅鑼灣時代廣場的豐澤電器世界選購打印機，準備安裝於其辦公室內使用。他看中一部價值二千九百八十八元惠普HPLASERJET1300型號雷射打印機，店員聲稱該型號打印機可提供首年原廠上門保養。「我就係怕咗拎嚟拎去嘅麻煩，所以要成三千蚊都揀呢部有上門保養嘅機！」
他說，使用不足兩個月，該打印機打印效果便出現黑線問題，他即致電原廠惠普要求派人上門維修，但惠普職員稱，該型號打印機不會提供上門保養，着他自行聯絡豐澤；他遂致電豐澤，惟職員卻指保養是由惠普負責；他無可奈何，只好再繼續致電「兩邊搵」；然而，最終卻得到「出人意表」的答覆。
「豐澤話惠普確係由今年初開始提供首年上門保養，不過，原來係唔包括我買呢隻喎！咁𠵱家豐澤又唔保，原廠又唔關事，部機𠵱家就只可以丟喺度冇得用！」朱先生直斥豐澤刻意誤導，似乎有意以此作賣點吸引顧客。
記者嘗試往荃灣沙嘴道豐澤分店查證，向該店職員查詢HPLASERJET1300型號打印機的保養問題，對方肯定地表明，該型號打印機可提供首年原廠上門保養，並稱如欲於首年後繼續上門保養服務，可額外繳付保養費以延長保養期。而環顧店內陳列的HP打印機，許多均貼上提供「首年原廠上門保養」字樣。
惠普發言人何先生表示，HPLASERJET1300型號打印機並未附設上門保養服務，只有部份型號產品提供上門保養，例如一些體積較為龐大、客人根本難以自行提取的座地產品，該公司才會附設此服務，以減少對顧客的不便。
何先生續稱，該公司會於事前向分銷商提供各種產品的詳細資料，包括保養服務的範圍，分銷商理應清楚此型號打印機確不會提供原廠上門保養服務。
豐澤發言人對有關事件直認不諱；而事實上，有關投訴人所選購的打印機型號，確沒有提供原廠上門保養，該公司已提醒各員工有關情況；當記者反問為何事後到豐澤分店，仍發現有店員指該打印機型號附設原廠上門保養時，發言人則表示會再全面訓示所有員工，要求他們清楚地給予客人正確資料。對於是次事件為客人帶來不便，豐澤表示歉意。 ﹙○七一八○二三﹚
服務熱線
電話:29908288
傳真:23702192
電郵: