鳳凰衛視主席劉長樂同八方講，呢兩個月見過董特首同埋廣東省委書記張德江，要香港「再造購物天堂」，廣東就做其生產基地。重好認真咁出咗本書《再造天堂──振興香港經濟的思考》。佢話今日會同幾間報館老闆食飯，約定齊齊唱好香港。八方明知故問，問佢有冇約埋肥佬黎？肥佬劉話冇，但好禮貌咁話有機會應該傾傾，橫掂大家都鍾意去天香樓食杭州菜。
八方問肥佬劉，北京軍醫蔣彥永大爆沙士疫情內幕，鳳凰衛視點解唔做，要外國傳媒報道先知北京咁大鑊？劉長樂大叫寃枉，蔣彥永話四月四日將八百字長信電郵給中央第四台及鳳衛，佢查過，原來封電郵去咗已關閉嘅伊拉克「軍情觀察室」。
傳真︰2623-9278
電郵︰