港府開始向市場吹風，話3年內樓市供求將趨於平穩，現時無意再出招救樓市，只會考慮深化「孫九招」政策，以及考慮延長發展商手上項目嘅發展期。
一名前輩話，既然港府對樓市供求平衡有「時間表」，最好就係讓樓價再Overshoot，等市民買多些平樓，待日後發展商補充土地儲備時抬高地價，樓價亦會隨之上升，市民財富增加，消費信心自然回復，經濟便可加快復甦。如果政府一味幫發展商托價賣樓，反而會窒礙香港整體經濟復甦。
港股噚日險守萬點關，收報10008，跌94點，成交再減至77.89億元。期指尾段跌幅擴大至138點，報9962，低水46點。據聞有歐美資金驚凱利之死令美英政局不穩，可能會拖累歐美股市走勢。
中資股未因此而成為資金避難所，前日獲歐資追捧嘅中電信（728），噚日遭拋售大跌逾5%，主要原因為美資JP摩根大通開始減持，市場同時傳出美資大戶亦開始減持國企股，據講美資驚中國減持國有股方案落實後，國企股供應量將大增，所以現在就要減磅。
不過JP摩根大通對工業股仍有興趣，上周三以每股平均價5.74元增持立信（641）64.8萬股，噚日消息曝光，刺激股價勁升6.2%，收6元。
華豐環保紡織（364）突然掛免戰牌，公司話計劃配售6700萬股，據聞配售價介乎1.16-1.12元，接貨者據講係大基金，唔會派通街，應可守得住。
阿虎