起樓除咗地價之外，建築成本都好影響項目賺錢能力。啱啱喺五月攞咗入伙紙嘅將軍澳維景灣畔三期其中四幢物業，建築費非常高，與同區將軍澳廣場一期四幢物業相比，兩者差距相當大。
資料顯示，維景灣畔三期嗰四幢樓，要十一億五千幾萬元，建築樓面呎價大約一千零四十三蚊。
將軍澳廣場一期就只係六億四千萬元，建築樓面呎價五百三十三元。
唔怪之得，維景灣畔發展商太古同新地做咗幾次大幅撇帳之餘，點都唔肯加入同區劈價戰，原來有苦衷嘅。
蘭西好阿Q咁諗，住維景嘅業主，雖然𠵱家賣番出去要蝕錢，但諗到原來連埋地價拉勻嚟計，第三期淨係計成本，原來都要三千幾蚊，佢哋變相賺咗發展商唔少，同埋又有咁多會所設施用，心理上會好過啲。
豪宅物業近日交投活躍，太古地產山頂甘道三號開售唔夠一個月，市場傳出，最後一間洋房四號屋，已有買家出價七千萬，料賣出嘅機會好大。間屋四千三百七十四呎，每呎造價達一萬六千，係四間洋房中最貴嘅一間。
之前賣咗嘅三間屋，每呎萬四至萬五。蘭西翻查資料，四號洋房花園面積二千幾呎，陽台面積六百四十三呎，係四間屋中最大，而且連三個車位，難怪愈賣愈貴。
地鐵物業管理高級商場市務經理陳嘉明話，喺四五月「沙士」襲港期間，地鐵商場動用資金一千五百萬，較去年全年用作宣傳嘅費用多出五成，成效價值遠超過一千五百萬，因為商場人流量恢復正常，商戶生意額又回升。
既然有效，地鐵一於再嚟一次。最新動作係，聯同港龍合作，以最低二五折，送上海、北京機票，名額二千個，另隨每張機票加送二百蚊現金購物券，宣傳費一百萬。
七月樓市暢旺，又係各大地產代理豐收嘅月份。中原黃偉雄透露今個月至二十日，中原香港已經錄得超過五千一百萬佣金收入，其中元朗教育路分行，係第一支突破一百萬元佣金嘅隊伍，有新盤開嘅地區，戰績果然彪炳。
十一位表現突出嘅管理層都有獎金，由一萬八至八萬蚊不等，合共三十六萬元。後勤部隊獲發四分一個月嘅特別花紅。
至於港置，日前都為上半年嘅理想業績大排筵席慶祝，並頒發多個獎項，最佳分行經理由康怡發展商專組營業經理夏笑笑奪得，最佳營業員係赤柱分行嘅曹婉琴，兩位都係女將。
屬於九龍傳統豪宅區嘅京士柏，原來大有來頭。噚日聽新世界發展嘅何伍燕榆（何太）講，京士柏呢個名可追溯至一百年前。
呢幅前身為軍事用地嘅京士柏山頭地皮，原本係紀念英皇愛德華七世登基而改建嘅皇圃，所以英文叫King'sPark，充滿皇族貴氣，時至今日，已成為顯赫嘅豪宅區，唔少商賈同名門望族，都聚居此區。
呢個喺市區嘅罕有豪宅地盤，有四十幾萬方呎，但覆蓋率只得兩成，屬於低密度豪宅。政府要求地盤範圍內兩棵古樹必須要保留，發展商將呢兩棵風水樹命名為「金枝」同「玉葉」。為彰顯豪門氣派，私家車路名為君頤大道，重有三十萬呎青葱園林及平台，環境怡人。
蘭西
電郵地址：
