面對鏡頭係一個人，背住鏡頭又係另外一個人？相信好多人對於寫真集擺晒款、MV入面正到爆燈嘅明星都會好奇，究竟佢地真人係咪都咁正、咁儀態萬千呢？八卦嘅其實又豈止我羅拉！為咗照顧讀者嘅需要，今次我羅拉就搵嚟五大新紮姐仔菊川怜、市川由衣、吉岡美穗、伊東美咲同若槻千夏嘅offcut嚟公諸同好，原來佢哋五個未埋位時都一樣咁正，而且唔擺款，真係可以話係食正呢行飯。
我聽過有人嫌市川由衣身材普通樣貌過娘，唔明點解佢都會紅咁話！原來佢好識得冧工作人員之外，對鏡頭亦好敏感，新人嚟講擺甫士算好叻。你睇佢拍寫真集休息時，有隻狗仔走埋身，就即刻搵吓鏡頭喺邊重作埋個嫵媚樣，呢啲咪叫識搵機會囉。
影親水着相都好似尷尷尬尬嘅吉岡美穗，其實係個好傳統嘅日本女仔，以服侍所愛男人為終身的目標。佢返工嘅時候T恤牛仔褲加馬尾一條，真係少啲眼力都唔認得佢係明星。而重算新人嘅佢從來唔擺款，連同輩嘅女星好似乙葉咁都好鍾意佢。
穩佔一線女星地位嘅伊東美咲，紅得梗有原因。你睇佢化化吓妝見到有人影相，即刻騷佢做代言人嘅唇膏，唔怪之佢廣告合約數目直逼十份。
打正高學歷斯文淑女旗號嘅菊川怜，真人其實意外地活潑，拍拍吓廣告都可以着住套裝同人打boxing，難怪佢同陽光男加藤晴彥咁夾！
無論鏡頭前點迫爆都好，其實水着女星一唔使埋位，都即刻着返件大褸遮遮掩掩，但係妹妹仔若槻千夏依然着住件三點式滿場飛，同工作人員起勢咁玩，唔通佢真係對自己身材咁有信心？