恒指最低9957，尾市一萬點失而復得，收10008，但期指則散138點，守唔住一萬點，收9962，低水46點。正路睇法，係個市重會再落些少，喺一萬大關上下反覆。
短炒吼低買輪，有多少利潤即沽貨離場。新地（016）收45.40元，跌60仙，Call輪9786散11%，收50仙，可博反彈，隻輪數據唔差，10月初到期，溢價得1.3%，而槓桿率則有9.1倍。另外隻9799條件相差唔大，壽命長多幾日，輪價62仙，溢價1.8%，槓桿率7.3倍。
和黃（013）回落1元，收50.25元，估計50元齊頭關口守得住，熱門Call輪9765昨日散14.5%，短炒有留意價值，9月到期，現價29.5仙，溢價3.4%，槓桿率17倍。隻輪波幅大，快上快落，炒賣要眼明手快。華創（291）收6.85元，跌10仙。始終係老牌大紅籌，跌到咁上下，就會有人趁低吸納，或者維持秩序，吼Call輪9270博反彈，隻輪9月中以後夠鐘，輪價5.5仙，溢價2.3%，槓桿率12.5倍，爆炸力唔細。
中電信（728）跌5.7%，跌幅近期少見。到底係芬佬長期儲貨對象，大市氣氛一旦好轉，中電信又會升番，吼住Call輪9696，隻輪11月到期，輪價67仙，溢價2.7%，槓桿率3.1倍，槓桿率唔大所限，波幅唔會太大。
中移動（941）跌落20.35元，如果20元守得穩，則揀啲成交多嘅Call輪落手。
章盛