昨日同經紀黃傾開，發覺最近有個怪現象，就係公司公布業績盈利上升，但股價下跌，反而有啲公司盈利倒退，股價當日雖然受壓，但好快就升番轉頭。
好似早排富士高（927）公布全年盈利下跌41%，當日股價勁跌，但第二日旋即急升，跟住重升上全年高位，然後大股東成功減持6%股份。
另一隻就係做開玩具車仔嘅建溢（638），在公布業績之前，股價由1.40元升上1.75元水平。前日公布全年業績，盈利倒退27%，股價即刻回落到1.50元水平，但好奇怪在低位一直有承接，噚日逆市升1.96%，收1.56元。
經紀黃話，建溢今次盈利倒退，主要係受玩具車仔業務盈利減少所累，實情公司近年悉心發展的摩打業務仍有增長，加上建溢今次盈利倒退係一早預咗，家陣分析員成日話要向前看，所以建溢股價有支持並唔出奇。
經紀黃話又話，家陣工業股中，好似建溢重係單位數字PE其實唔多，預期PE只係5倍多，所以仍然有留意價值。
慕容小初