XBOX終於喺暑假出招，計劃中足足有五、六款大作陸續抵港，打頭炮嘅係前作口碑不俗嘅《MidtownMadness3》，香港XBOX重喺行貨推出前，跟《蘋果》合作搞咗個試玩會，除大班XBOXFans齊集外，重有外號竹園田北俊嘅Terry，教大家攻略要點同戰鬥技巧㖭。
記者、攝影：徐影龍
「《MidtownMadness3》可算係鬼佬版《CrazyTaxi》，不過版圖更大，想快速完成任務過關，不妨先喺Cruise自由模式度摸熟環境，發掘多啲暗藏跳台，如大坑渠等捷徑，縮短路程所花時間。對戰方面，跑車類雖然佔速度上嘅優勢，不過跟大車硬撼起嚟，損壞得特別快，若遇着多部大車夾攻，就要特別小心，千祈唔好硬拼。」
嚟到機能最強嘅XBOX，畫面梗有番咁上下。一班Fans都被其精細畫面吸引，尤其今集兩個新加重頭城市：華盛頓同巴黎，大量特色建築物充斥街頭，遊戲版圖又鬼咁大，大可圍住巴黎鐵塔同白宮完成過關任務，High起上嚟不理交通規則，瘋狂咁橫衝直撞，有機迷更指遊戲設定跟實地一模一樣，不妨慢慢行，當遊車河咁周圍欣賞沿途建築物，雖然屬另類玩法，不過由此證明呢隻Game圖像表現幾咁優異。
基本玩法跟世嘉名作《CrazyTaxi》差不多，指定時間內，揸住架車四出收集包裹。較為優勝係一共有14種唔同職業，如送Pizza、的士佬、巴士佬甚至扮警察都得，唔同嘅車有性能上嘅差異，一啲如垃圾車等大型車輛，雖然速度稍慢，不過勝在襟撞襟捱，炒極唔爛，尤其適合對戰之用。有時為咗慳番啲時間，衝入對頭線、鏟上行人路等少不免，最搞笑係任你架車幾快都好，街上行人都閃避得到，唔怕發生流血事件。
你都想試XBOX嘅新Game？想做《PGR2》、《Sudeki》同《Fable》等大作嘅測試員，可將簡單個人資料、對XBOX之觀感及聯絡方法，電郵至[email protected]（主旨標明招募測試員），就有機會測試新Game，並得到XBOX為《蘋果》讀者訂做嘅紀念品––水晶試Game證書，絕對機會難逢。