香港有得Fun：
厚多士水上飛激到甩泳衣

星期一下午兩點，正懸掛一號風球，淺水灣時晴時雨，四位不懂游泳的靚女Joyce、Yoko、Olivia及Cystal，望着蔚藍大海，齊聲大叫：「我嚟啦！」我以為她們想投奔怒海，突然一艘快艇飛馳而至，靚女船家即叫：「妳哋都好勇喎！天氣差都照玩！」接着，魚貫上艇，十五分鐘後，我被一陣陣嘩嘩聲嚇倒，以為大風浪吞噬眾靚女，細看下，原來她們玩着高速水上玩具！站在岸邊看着她們，大叫又大笑，還依稀聽到：「我件泳衣甩咗呀！」當真？

記者：梁佩芬　攝影：陳盛臣
Models：Joyce、Yoko、Olivia&Cystal（SunSpot）

厚多士人叠人
刺激度：＊＊＊＊＊
價值$5,000的大浮床，遠看猶如一塊厚多士，是今年最新產品，六月才正式抵港，只此一隻！一聽是新產品，Joyce同Yoko就自告奮勇，立即舉手搶先玩！厚多士可以瞓兩個人，每人都可扼着前及旁邊的兩個把手。

電單車一轉彎翻「車」
刺激度：＊＊＊＊
Cystal見佢哋玩到泳衣都差啲飛埋出嚟，諗住玩電單車唔會咁激。呢架水上電單車並沒有動力，得個樣，全靠快艇拉住滑行，Cystal就貪佢有型，二話不說就一個人跳上車，有冇興趣睇睇佢水上英姿？

單人椅舒服到瞓着
刺激度：＊＊
Joyce經過厚多士的煎熬，就話要歎番吓，船家即話：「坐單人椅囉，瞓着都無問題！」其餘三美不信，以為船家講反話，遂坐定定，睇吓Joyce又要飲幾多水！單人椅坐位有一呎深，但唔使雙腳FingFing，睇落幾舒服喎！

高速玩意邊度玩？
WeweWakewake
費用：每小時$500，一船最多五人。
查詢：97092824

吹氣水上玩意唔識游水都玩得
大熱天時，除了去海灘游水曬太陽，原來重可以一試呢啲咁激嘅水上玩意，最重要嘅係唔使學，冇技術可言，人人都玩得。就呢日所見，烈日當空，四位玩咗成兩個多鐘，雖然埋單要千多元，又撻到PatPat痛，仍大叫：「物有所值！」