到電影院看《海底奇兵》，記得要提早入場，因為有好多正預告片睇，《海底奇兵》係闔府統請電影，所以大人細路迫爆戲院，看準這個機會，大量卡通鉅獻預告片放送。
先嚟一齣《仙巴》，此卡通無論格局、造型、故事都有點土味，據聞在美國亦唔收得，在香港都應該難倖免。
另一齣是Pixar繼《海底奇兵》後的力作，名字叫TheIncredibles，趁佢未有譯名，搶閘替其改個名叫《飛天肥佬俠》，預告片講個肥佬想着番件超人衫但太肥着唔落，短短分零鐘已有幾個爆笑位，單睇預告片已經想買定飛等睇戲。
再一齣係關於動物與森林嘅卡通，唔記得係咩名，只記得預告片又係好好笑，一隻動物在對觀眾說：「如果你一年只看一齣戲的話……」，另一隻動物搭嘴：「應該趕唔切叫佢哋睇我哋嗰齣咯喎，因為佢哋睇嗰齣重有幾分鐘就開場……」，動物補充說：「唔係叫佢哋睇我哋嗰齣，只係想趕嗰啲一年只睇一齣戲嘅人走，離晒譜！」
《海底奇兵》開場前，先播放了一段短片，該短片KnickKrack是Pixar在成名前，即係未拍《反斗奇兵》前的作品，該短片證明了Pixar的能力，除了對科技及卡通的掌握外，更重要的是他們的創作，用童話筆觸去配合一些反叛、頑皮、略帶賤賤哋嘅喜劇風格，結果讓大公司看中，如今Pixar在荷李活，呼風喚雨，一班後生仔，發過豬頭。