廖啟智同陳敏兒嘅三歲細仔文諾不幸患上血癌，敏兒二十四小時喺醫院陪囝囝，而智叔就因為要照顧大仔同二仔，所以日日醫院屋企兩邊走。噚日智叔返無綫拍新劇《樊梨花》，拍完佢最後一場戲之後，佢就會休息一段時間，專心照顧幾個囝囝。
薛家燕（好姨）喺化妝間見到智叔時，就同智叔講文諾嘅事，好姨重講到眼濕濕。智叔講到文諾𠵱家嘅情況，佢話：「幾穩定，囝囝好叻肯食嘢，噚日佢重同敏兒講『謝謝媽媽』，搞到敏兒不知幾咁開心，不過，佢一見到醫院啲姑娘就叫佢哋走，可能知道佢哋都係冇好嘢啦！」
智叔又話好多謝身邊朋友嘅關心，好多人畀咗鼓勵同信心佢哋。好姨提議佢可以喺電台呼籲熱心人捐贈骨髓，智叔話會考慮吓，但目前重未有呢個需要。
噚日有雜誌報道指，曾經喺嘉禾電影任職製作經理嘅食家兼專欄作家蔡瀾，前列腺有事，早排喺伊利沙伯醫院做咗個手術，報道話蔡瀾早排小便時覺得有困難，去咗搵醫生檢查，發現前列腺果然有問題，醫生要求佢最好做一個小手術，咁就會冇乜事，但如果唔做手術就手尾長，結果佢拖咗一輪，終於肯去醫院。聽聞個手術幾成功，馮仁昭噚日打電話畀蔡瀾求證件事，但係佢冇回覆。
由黎明、鄭伊健同吳鎮宇主演嘅《囗雄》下周四上映，硬撼荷李活猛片《盜墓者羅拉：生命之匙》，要贏呢部大製作，都唔係咁易。
投資者寰宇當然希望《囗》片可以好似《無間道》一樣大收啦。寰宇方面噚日話有歐美發行商以七位數字美金買咗《囗》片嘅版權。
張艾嘉早前搵咗劉若英、李心潔合作拍一部新戲《20：30：40》，故事講述三個介乎二十到四十歲嘅都市女性，點樣尋找自己嘅生活。張艾嘉重搵到幾個好好戲嘅男演員客串，例如梁家輝、黃秋生同任賢齊。張艾嘉亦將呢部精心傑作嘅全球版權，賣咗畀哥倫比亞電影製作公司。
李惠敏噚日喺屯門，為一間海鮮酒家擔任剪綵嘉賓，重有五位數字嘅大利是。李惠敏話啱啱炒咗個菲傭，因為佢手腳唔多乾淨，李惠敏話：「之前我啲首飾會無端端唔見，有次重發覺銀包冇咗一千蚊，問佢佢就好招積咁唔理我，惟有炒咗佢。我𠵱家要自己做晒啲家務，重辛苦過開九場騷。」
