保險界C先生講阿松個相太「削」，在阿松辭職前夕。呢啲意見，佢同左丁山有一個共同老友，就係八卦邱。八卦邱以前都話過，管錢之人，最好個面相夠飽滿，切忌下巴尖，尖則瀉財矣，正是管錢掌櫃之大忌。曾蔭權做財政司，已經嫌佢下巴略尖，點知換上阿松，重更加尖過尖沙嘴，所以八卦邱一早唔睇好。呢晚C先生講起，左丁山就記得佢一早已經講過。
次日夜晚，阿松正式宣佈辭職，報紙紛紛猜測乜誰會做財政司司長繼任人。睇過《蘋果日報》幾張相，打電話搵到八卦邱問一問，佢話：「以相論相（照《蘋果日報》相片），許仕仁做財政司司長比較好，葉澍堃次之，至於佢兩位有冇才幹，你自己諗掂佢。」再問：「呢個時候，有冇人肯跟董建華呢個老細呀？」
八卦邱話：「你都儍嘅，大把人搶住做啦。特首唔搵你，你就扮清高，話無謂加入爛攤子啫。話畀你聽，權力嘅誘惑，無可抗拒。財政司位高權重，一坐上去，城中巨富會約你打波，金管局、證監會、交易所阿頭都要對你好客氣，金融界邊個咁唔畀面？醜八怪坐上呢個位，都會變成明豔照人！只要特首邀請，實有人爭住上位嘅！」八卦邱睇通人性，權力令人着迷，香港咁多人，始終有人肯制，理得佢PeterPrinciple是否啱用！