港股未有受外圍升勢所帶動，在萬關之上爭持，恒指收10102，跌37點，成交只得82億元，國企進入消化期，工業股較突出。
有大成交支持升勢的工業股，以升岡國際（485）同華豐環保紡織（364）表現最勁，同上10大升榜，前者收24.3仙，升14.6%，後者高收1.22元，升14%。華豐傳又有基金敲門，表達強烈的入股意願，相信華豐會有進一步的行動。震雄（057）變身工業股王，升勢轉急，噚日再大升0.3元到3.9元；另一隻新灃集團（1223）更係長升長有，高收6.85元，又升5.3%，短短個多月，升幅已逾1倍。
基金揸工業股，可以好長線，就如德昌（179）、創科（669）、裕元（551）、福田（420）等，一揸就揸幾年，只要公司年年盈利有穩定增長，前景可靠，有合理的息率支持，基金亦會長揸落去。呢類基金股王，PE有高達二十多倍者，股價表現長期都係咁硬淨，雖然一般投資者好少沾手呢類基金股王，但有貨在手者，都可以話得係高枕無憂。近期有唔少新進嘅基金股，例如東強（615）、愛高（328）同華豐等，PE重係處於好低水平，而股價亦只係一個幾毫，較適合小投資者。
國企股個別發展，航空股仍有大盤在收集，東方航空（670）收1.08元，升2仙；南方航空（1055）收2.375元，升1個位。航空公司今年受非典影響，業績大倒退，且或會出現虧損，但基金看好其前景，因此仍繼續收集，時機一成熟，就會操上去。
南航發行之10億股A股，獲得94倍超額認購，售價2.7元人民幣，籌集27億元人民幣資金，主要用作購買新客機，A股將於本周五（25日）在上海交易所掛牌，有分析員估計，A股首日登場會漲升85%。南航6月份載客量較去年同期下跌55%至66.1萬人次，跌幅較5月份的83%有顯著改善。今年首4個月，南航虧損約2.2億元，但預測全年仍會有盈利逾2億元。
南航股價已升破250日線（2.2元），而10日線及20日線亦已升破250日線，中期升勢確認，2.425元係短期阻力所在，衝破後可見2.85元。
郭兆誠