恒指昨日走勢反覆，收市由升變跌，回落37點。個市都係反覆吓，大勢仍然係向上，吼低揸Call輪好過賭Put輪。
電盈（008）上星期以每股4.4元配股，上周五收4.35元，跌破配股價，阿楷增持超過1千萬股，銀両一掟落去就幾乎半億。電盈是日收4.375元，仍然低過配股價，要大幅反彈唔容易，但做番好少少唔困難，不妨細細注博吓Call輪，最正路係9791，明年3月到期，現價54仙，溢價15.2%，槓桿率8.1倍，昨日彈升8%，跑贏過正股好多，吼低啲先至上車。兩隻較短期嘅仙輪9662同9637，1仙求售，兩隻輪行使價分別係5.90元同7.4元，都好難救得番，大概直至夠鐘之日，都係1仙求沽，有賣冇買。
利豐（494）跌35仙，收10.55元。呢件高PE美國出口股，芬佬推上㩒低，唔會直線上，亦唔會直線落，跌到咁上下，又會忽然彈上，吼機會再跌多啲，揸Call輪9438博反彈。9438今年10月到期，輪價15.7仙，溢價2.6%，槓桿率6.7倍。
港交所Call輪9871收2.025元，升7%。正股（388）收12.60元，升10仙。港交所近排走勢靚靚，可能同股市好番有關，吼住有機會買隻Call輪，都係9871，年底夠鐘，溢價2.4%，槓桿率6.2倍。其他港交所Call輪，買唔落手。
章盛