左麟右李殺到日本
馮仁昭四圍超：阿倫帶老婆食盡東京

譚詠麟同李克勤呢對拍檔，上個禮拜齊齊去咗日本東京旅行，阿倫同佢嘅老婆Shirley、同埋Shirley嘅一班女性朋友，成班人一齊起程，同行重有一個七、八歲嘅細路仔㖭，而克勤就同佢女友盧淑儀一齊預支蜜月。
左麟右李去咗東京雖然只有幾日，但佢地都使咗唔少錢。佢哋一齊入住位於惠比壽區嘅六星級酒店WestinToykoHotel，不過行程方面就各有各玩。向來有食物焚化爐之稱嘅阿倫就以搵食為主，馮仁昭聽聞佢重特登走咗去原宿食法國菜㖭，而今年係日本迪士尼公園二十周年紀念，唔知阿倫有冇帶個小朋友去迪士尼玩呢？

撞正大減價
至於克勤同佢女友就瘋狂購物，重專登搵咗架保母車載佢地周圍去shopping。咁啱佢哋去日本嗰幾日，撞正東京大減價，結果當然滿載而歸。
克勤重同盧淑儀去咗涉谷區嘅一間髮型屋染咗個金啡色嘅新髮型，染完之後重直豎拇指大讚㖭！

葉璇獅城唱歌贈興
郭晉安同葉璇日前齊齊應邀去到新加坡，出席無綫旗下頻道嘅翡翠衞星台TVBJ誌慶，佢哋重雙雙在場表演歌舞，對於平時演開戲嘅安仔同葉璇的確有啲難度，好在都令到台下觀眾非常投入，掌聲不絕，所以為咗報答觀眾，佢哋就同觀眾近距離接觸玩遊戲，重送出親筆簽名相㖭。

張達明監製老婆棟篤笑
張達明同老婆噚日喺土瓜灣出席《女人騷二之雌線代言人》記者會，達明嘅老婆何念慈下月二十二號開四場棟篤笑，而達明會做監製。
達明話好驚老婆爆佢大鑊，不過，佢話：「睇完個騷就知道點樣反對付番佢（老婆）！因為個騷會講女性點樣對付男人，好似收埋私己錢，唔畀飽飯男人食咁。」

Steven唔想家姐入行
組合Boy'z噚日去到港台接受訪問，對於有報道話Steven個家姐Janny即將會簽麥浚龍阿哥麥俊翹間公司，Steven話佢家姐冇同佢傾過呢件事，而且佢都唔多贊成家姐做歌手。Steven話自己入行之後都體會到人情冷暖，因為一做錯事就會俾人鬧，好多嘢都要自己承擔，所以唔想家姐受呢啲苦。

關漢泉月還四千保父名
關德興個仔關漢泉早前被入稟申請破產，噚日佢去高等法院上庭，銀行要求他每月還款四千，而關漢泉表示可以接受，佢話死都要保住關德興個名，唔係就會名譽掃地，咁樣案件暫可告一段落。不過原來關漢泉嘅英文都唔差，因為佢噚日全程用英文同法官對答。